Psalms 38
Te Devitgo asęani balia po me deli dao.
Te sęgę elalubo bidigo gedu haluasa po wai
1Genuai Bidi, nago wado yabo homu elalubao,tiali goli nago enaba wado me iligio.
Nago haliga sębę yai,
tiali goli nago enaba dene me magio.
2Nago ene dabego nago ena mu enama,
tama naga nogogo nago ena aiyaba elaluali.
3Nago enaba wado ebaso, tama ena dwai gasi yai.
Eno sęgę elalubaso,
tama eno tigi bomo mu meni yai.
4Te ena sęgę dabego te ena mesegelama,
tama te sęgę dabe te eno walu tolai
sęgę tiwai elama, tama sęgę mu ebo dao.
5Te eno tigide elalubo kenide
te keni bole hauwa elalu, tama te kugumini mu ebao.
Eno te geda mubo kolesaga mu eyu,
tama te sę enaba pedelai.
6Eno haligade te genuai sęgę mu elama,
tama ena dolobao.
Te tigidali side ena homu dene eyu,
tama gela naga wabo dao.
7Eno tigi te posolo mu eyu, te siago dabo tiwai ebao,
tama ena genuai gasi mu elalubao.
8Ena mu dolama, tama ena dwai bidali,
te magi nai me deligo ena bomonama agabo tiwai
gilama yali.
Eno haligade te dwai homu mu yali,
tama ena te genuai denede i me weyu yali.
9Genuai Bidi, nago te eno bomai homu
wei ebo koneani.
Eno haligago dwai gela wabo,
tama nagede tebo te geme me
dualalubeo.
10Te eno hoboludu sę bomo mu ebaso,
tama eno bomo te mu sia salio.
Te eno gedu hulia selama,
tama eno bugagia ma tonosiąbo dao.
11Te eno abagi, me hai namu dabe,
te augwali ena pąba asabo homu isąwai.
Augwaligo te eno keni suabo homu isąwai.
Tama ena hani sibi dabe augwali te digibulu bidibao.
12Te ena ela muainu ebo bidi dabe,
augwaligo te ena tola somainu yabo
bono gągą sisi elama, muani.
Te ena dolainu ebo bidi dabe,
augwaligo te enaba dwai sę yabo po miani.
Tama sesemane sogo augwaligo enaba
dwai sę yabo homu kolesaga ebo dao.
13Tiali goli, ena te olo degai bidi tiwai elama,
tama eno augwaligo wabo po me odobeo.
Ena te pedauwali pania sai tiwai elama,
tama eno pedauwali me a me wabeo.
14Ena te po odisąbo bidi me deli
tiwai gilama yali, tama eno augwaliba
te po wei me ponobeo.
15Tiali goli, Genuai Bidi,
eno konealubo homu nageba dąų wali.
Genuai Bidi, nage eno God da,
te naga digi enaba te po
wei ponomainu yaibao.
16Eno te tama gedu haluasa po wali,
“Nago te boi bidi dabego ena aiyaba elaluama,
tede kęnę omainu me elamuo,” wali.
“Te ena dwasianu tula mubo sogo,
nago te augwali hagoma eyu,
wiegi yai homu pemene emainu me igio,” wali.
17Magi baso meni, te pąde ena tulaluainu eyu,
tama ena sesemane sogo dene ebo dao.
18Eno dwai sę yali po nageba pusali,
tama ena yali sęgęde ena homu dene yai.
19Te eno boi bidi tigidaligo te bomo mu ebao.
Te bidi hauwa umabogo
te enaba odolali boi bidi ebao.
20Eno dwagi yai kolesaga augwaliba ebadi,
tiali goli augwaligo enaba
dwai kolesaga wei ponoyu yai.
Eno te wiegi yai kolesaga wali pobadi,
tama tede augwaligo homu koneama,
tama enade augwa boi bidi pedelali.
21Genuai Bidi, nago ena me tagaligio.
Eno God, nage te enade digibulu me bidigio.
22Genuai Bidi, nage da ena ma dobola sabo bidi da.
Nago ena polo tama tau sao.
Copyright information for
MPS